ប្រទេសថៃជំរុញកិច្ចសហប្រតិបត្តិការអាស៊ានសម្រាប់ការស្តារឡើងវិញក្រោយជំងឺរាតត្បាត
រាជធានីភ្នំពេញ៖
នៅថ្ងៃទី០២ ខែសីហា ឆ្នាំ២០២១
ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសថៃ លោក Don Pramudwinai នឹងចូលរួមកិច្ចប្រជុំថ្នាក់រដ្ឋមន្ត្រីអាស៊ានលើកទី ៥៤ និងកិច្ចប្រជុំពាក់ព័ន្ធនៅថ្ងៃទី២ ដល់ថ្ងៃទី៧ ខែសីហា តាមរយៈសន្និសីទវីដេអូ។
យោងតាមក្រសួងការបរទេសរបស់ប្រទេសថៃបានឱ្យដឹងថា លោក Don Pramudwinai នឹងឆ្លៀតយកឱកាសនេះដើម្បីលើកកម្ពស់កិច្ចសហប្រតិបត្តិការលើគម្រូសេដ្ឋកិច្ច Bio-Circular-Green (BCG) ក៏ដូចជាការស្តារឡើងវិញគ្រប់ជ្រុងជ្រោយក្រោយជំងឺរាតត្បាតកូវីដ-១៩ និងការគាំទ្រ ពហុភាគីនិយម និងកិច្ចសហប្រតិបត្តិការក្នុងតំបន់ដើម្បីដោះស្រាយបញ្ហាប្រឈមក្នុងតំបន់ និងក្នុងពិភពលោក។
ក្នុងអំឡុងពេលនៃកិច្ចប្រជុំថ្នាក់រដ្ឋមន្ត្រីការបរទេស បណ្តារដ្ឋមន្ត្រីការបរទេសអាស៊ាននឹងពិភាក្សាអំពីវិធីលើកកម្ពស់ការកសាងសហគមន៍អាស៊ានដែលផ្តោតសំខាន់ទៅលើប្រជាជន ការរៀបចំសម្រាប់បញ្ហាប្រឈម និងឱកាសនាពេលអនាគត ព្រមទាំងការរីកចម្រើនជាមួយគ្នាក្រោមប្រធានបទ «យើងយកចិត្តទុកដាក់ យើងរៀបចំ យើងរីកចម្រើន» និងអាទិភាពក្រោមការធ្វើជាប្រធានអាស៊ានរបស់ប្រទេសប្រ៊ុយណេដារូសាឡឹមនៅក្នុងឆ្នាំនេះ។
ក្នុងការចូលរួមជាមួយដៃគូខាងក្រៅ បណ្តារដ្ឋមន្រ្តីការបរទេសអាស៊ាននឹងរំលឹកឡើងវិញអំពីសារៈសំខាន់របស់អាស៊ាននៅក្នុងរចនាសម្ព័ន្ធតំបន់ដែលកំពុងមានការវិវត្តន៍ ចំពេលដែលមានភាពមិនច្បាស់លាស់នៃសក្ដានុពលសន្តិសុខក្នុងតំបន់ និងបញ្ហាប្រឈមដែលកំពុងកើតមាន ជាពិសេសបញ្ហាដែលកើតឡើងពីការរីករាលដាលនៃជំងឺកូវីដ-១៩ ។
លើសពីនេះទៀត ពួកគេនឹងពិភាក្សាអំពីកិច្ចខិតខំប្រឹងប្រែងរួមរបស់អាស៊ានដើម្បីដោះស្រាយបញ្ហាប្រឈមក្នុងតំបន់ និងក្នុងសកលលោក រួមទាំងការអនុវត្តនូវកិច្ចព្រមព្រៀង ៥ ចំណុចដែលមេដឹកនាំអាស៊ានបានឯកភាពគ្នាកាលពីថ្ងៃទី២៤ ខែមេសា ឆ្នាំ២០២១ និងរៀបចំសម្រាប់កិច្ចប្រជុំកំពូលអាស៊ានលើកទី ៣៨ និងលើកទី ៣៩ និងកិច្ចប្រជុំកំពូលពាក់ព័ន្ធនៅក្នុងខែតុលា ឆ្នាំ២០២១ ខាងមុខនេះ។ ពួកគេក៏នឹងពិភាក្សា និងផ្លាស់ប្តូរទស្សនៈជាមួយដៃគូខាងក្រៅផងដែរអំពីស្ថានភាពនៃការរីករាលដាលជំងឺកូវីដ-១៩ និងបញ្ហាតំបន់ និងអន្តរជាតិសំខាន់ៗដទៃទៀតដែលជាការព្រួយបារម្ភរួម។
នៅក្នុងឆ្នាំនេះ ប្រទេសថៃនឹងប្រគល់កិច្ចសម្របសម្រួលរវាងអាស៊ាន-ឥណ្ឌាទៅឱ្យប្រទេសសិង្ហបុរី ហើយនឹងទទួលយកនូវកិច្ចការសម្របសម្រួលរវាងអាស៊ាន-ជប៉ុនពីប្រទេសវៀតណាមវិញ៕ (ប្រភពពី VNA)