លោកអធិការក្រុងប៉ោយប៉ែត ចុះអប់រំណែនាំគ្រប់ម្ចាស់កាសុីណូ ហាមកុំឲ្យពលរដ្ឋខ្មែរចូលលេង

លោកអធិការក្រុងប៉ោយប៉ែត ចុះអប់រំណែនាំគ្រប់ម្ចាស់កាសុីណូ ហាមកុំឲ្យពលរដ្ឋខ្មែរចូលលេង

ចេញផ្សាយថ្ងៃអង្គារ ១៤ រោច ខែកត្តិក ឆ្នាំខាល
ចត្វាស័ក ពុទ្ធសករាជ ២៥៦៦
ត្រូវនឹងថ្ងៃទី២២ ខែវិច្ឆិកា ឆ្នាំ២០២២
ដោយ៖ការិយាល័យនិពន្ធនាយក
គេហទំព័រ ម្សិលមិញថ្ងៃនេះ

ខេត្តបន្ទាយមានជ័យ៖លោកវរសេនីយ៍ឯក សៅ សារឿន អធិការក្រុង ប៉ោយប៉ែត បានចាត់មន្ត្រីក្រោមឱវាទ ចុះអប់រំណែនាំ ម្ចាស់កាស៊ីណូទាំងអស់ដែលមានទីតាំងឋិតនៅក្នុងភូមិសាស្ត្រ ក្រុងប៉ោយប៉ែត ដែលបានទទួលសិទ្ធិស្របច្បាប់ ពី ក្រសួងពាក់ព័ន្ធ បើកដំណើរការល្បែងស៊ីសង និង ហាមដាច់ខាត មិនអោយ មានពលរដ្ឋ ខ្មែរ ចូលទៅលេង នោះទេ ព្រោះនេះគឺជាសកម្មភាព ល្មើសនិងច្បាប់។ នេះបើយោងតាមសម្តីលោកវរសេនីយ៍ឯក សៅ សារឿន អធិការ នគរបាលក្រុង ប៉ោយប៉ែត បានប្រាប់ សារព័ត៌មាន គេហទំព័រម្សិលមិញ ថ្ងៃនេះ www.ytn-news.asia យើងអោយដឹងកាលពី រសៀលថ្ងៃទី ២២ ខែវិច្ឆិកា ឆ្នាំ២០២២នេះ ។

លោកអធិការ បន្តថា ថ្មីៗនេះ មានសារព័ត៌មាន មួយ បានធ្វើការផ្សព្វផ្សាយមានចំណងជើង និង ខ្លឹមថា : លោកគាត ហ៊ុល និងលោកសៅ សារឿន កំពុងតែនាំគ្នាផ្គើន និងបទបញ្ជារបស់សម្តេចតេជោហ៊ុនសែន ទាក់ទងនិងករណីកាស៊ីណូ យីហោ ហ្គូដវើលដ៍ ហៅកាសុីណូស្រះទឹក បើកលេងល្បែងស៊ីសងគ្រប់ប្រភេទ អោយខ្មែរចូលលេងយ៉ាងអនាធិបតេយ្យ សង្ស័យជាឆ្នំាងបាយរបស់សម្ថកិច្ច និងអាជ្ញាធរ។ ក្នុងនោះសារព័ត៌មាន បានចុះផ្សាយទៀតថា នៅក្នុងកាសុីណូ ហ្គូដ វើលដ៍ គឺមានបង្កប់នូវល្បែងជល់មាន់ផងដែរ ។

លោកវរសេនីយ៍ឯក សៅ សារឿន បានបញ្ជាក់ថា បន្ទាប់ពី បានទទួលព័ត៌មាននេះហើយ លោកបានចាត់មន្រ្តីជំនាញ ចុះស្រាវជ្រាវ និងស៊ើបអង្កេត យ៉ាងយកចិត្តទុក ជាលទ្ធផល រកឃើញថា ក្នុងកាសុីណូមួយនេះ ពុំមានល្បែងជល់មាន់ដូចការចុះផ្សាយនោះទេ រីឯរូបភាព គឺជារូបភាពចាស់ យកមកពីកន្លែងផ្សេង មិនមែនឋិតក្នុងទីតាំងកាសុីណូ ហ្គូដ វើលដ៏ ឡើយ ។

លោកបន្តថា ចំពោះ កាស៊ីណូនេះ គឺគេមានច្បាប់អនុញាតត្រឹមត្រូវ ដោយឡែកលោកក៏បានអោយម្ចាស់ទីតាំងធ្វើកិច្ចសន្យាផងដែរ គឺហាមមិនអោយពលរដ្ឋខ្មែរចូលលេងឡើយ បើម្ចាស់កាសុីណូ ហ្គូដ វើលដ៏ ឬ ទីតាំង ផ្សេងទៀត ហ៊ានបំពាននិងការបំរាមនេះ គឺ លោកនិងចាត់ការតាមនីតិវិធីច្បាប់ ៕