សត្វក្របីឡើង-ក រត់ចូលផ្សារត្រីវ័ធមនុស្ស៤នាក់របួសធ្ងន់ និងពីរនាក់របួសស្រាលផ្អើលក្រុងប៉ោយប៉ែត
ចេញផ្សាយថ្ងៃចន្ទ ៩ រោច ខែជេស្ឋ ឆ្នាំថោះ
បញ្ចស័ក ពុទ្ធសករាជ ២៥៦៧
ត្រូវនឹងថ្ងៃទី១២ ខែមិថុនា ឆ្នាំ២០២៣
ដោយ៖ ការិយាល័យ និពន្ធនាយក គេហទំព័រ ម្សិលមិញ ថ្ងៃនេះ
ក្រុងប៉ោយប៉ែត៖ នៅព្រឹកថ្ងៃទី១២ ខែមិថុនា ឆ្នាំ២០២៣នេះ សត្វក្របីឡើង-កមួយក្បាលបានរត់ចូលក្នុងផ្សារត្រី ស្ថិតនៅភូមិក្បាលស្ពានពីរ សង្កាត់អូរជ្រៅ ក្រុងប៉ោយប៉ែត និងបានវ័ធប្រជាពលរដ្ឋដែលធ្វើដំណើរចេញចូលផ្សារ បណ្តាលឱ្យមនុស្ស៦នាក់រងរបួស ក្នុងមនុស្ស៤នាក់រងរបួសធ្ងន់ពីរនាក់។
លោក តាំង លីហេង សមាជិកក្រុមប្រឹក្សាសង្កាត់អូរជ្រៅបានថ្លែងប្រាប់ភ្នាក់ងារ ម្សិលមិញ ថ្ងៃនេះថា៖សត្វក្របីឡើង-កមួយក្បាល បានរត់ជល់មនុស្សម្នាដែលកំពុងជិះម៉ូតូចូលទិញម្ហូបនៅផ្សារត្រី លក់បន្ថែសាច់ ដោយបានរត់ដេញជល់អ្នកជិះម៉ូតូឌុបគ្នា២នាក់ពីក្រោយបណ្តាលឱ្យដួល និងបានវ័ធស្នែងត្រូវនារីម្នាក់រងរបួសធ្ងន់ ត្រូវបានប្រជាពលរដ្ឋដឹកយកទៅមន្ទីរពេទ្យសង្គ្រោះអាយុជីវិតភ្លាមៗ។ ក្រោយមកក្របីនោះ បានរត់ទៅវ័ធប្រជាពលរដ្ឋ៤នាក់ផ្សេងទៀតឱ្យរងរបួសបន្ថែម ពោលគឺរបួសធ្ងន់បួននាក់(ស្ត្រី៣នាក់ត្រូវបានដឹកយកទៅសង្គ្រោះភ្លាមៗនៅឯមន្ទីពេទ្យបង្អែកក្រុងប៉ោយប៉ែត។ និងពលរដ្ឋ២នាក់រងរបួសស្រាលៗ។
លោក តាំង លីហេង បានបញ្ជាក់បន្ថែមទៀតថា ក្រោយក្របីឈ្មោលឡើង-កមួយក្បាលនេះវ័ធប្រជាពលរដ្ឋរបួសធ្ងន់ ភ្លាមៗកម្លាំងនគរបាល និងកម្លាំងកងរាជអាវុធហត្ថ រួមជាមួយប្រជាពលរដ្ឋនៅក្បែរនោះ បាននាំគ្នាដេញស្ទាក់ចាប់ជាង២ម៉ោងទើបចាប់បាន ដោយបុរសម្នាក់ដឹងក្បួនពីវិធីចាប់ និងបានប្រើវិធីដើរលបៗទៅជិតលូកពង និងអង្អែលក្បាលយកខ្សែទាក-ក ចងជើងទាំង៤ដឹកមកទុកនៅអធិការដ្ឋាននគរបាលក្រុងប៉ោយប៉ែតរង់ចាំម្ចាស់ចូលខ្លួនមកដោះស្រាយ និងទទួលខុសត្រូវចំពោះមុខច្បាប់ ខណៈអាជ្ញាធរកំពុងស្រាវជ្រាវរកម្ចាស់ក្របីនេះផងដែរ៕
