ភូមិបឹង៧៥តេជោឈ្នះឈ្នះ ក្នុងឃុំទួលពង្រ ស្រុកម៉ាឡៃ ត្រូវបានប្រកាសតំបន់វិនិច្ឆ័យ ត្រៀមរៀបចំចុះបញ្ជីដីធ្លីមានលក្ខណជាប្រព័ន្ធ
បន្ទាយមានជ័យ ៖ ប្រជាពលរដ្ឋជាច្រើនគ្រួសាររស់នៅក្នុងភូមិបឹង៧៥តេជោឈ្នះឈ្នះ ក្នុងឃុំទួលពង្រ ស្រុកម៉ាឡៃ ខេត្តបន្ទាយមានជ័យ និងទទួលបានដីមានកម្មសិទ្ធិស្របច្បាប់ ខណៈដែលក្រុមការងាររបស់មន្ទីររៀបចំដែនដី នគររូបនីយកម្ម សំណង់ និងសុរិយោដីខេត្តបន្ទាយមានជ័យ បានរៀបចំពិធីប្រកាសតំបន់វិនិច្ឆ័យត្រៀមរៀបចំចុះបញ្ជីដីធ្លីមានលក្ខណជាប្រព័ន្ធ នៅថ្ងៃចន្ទ ៣ រោច ខែជេស្ឋ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២៤ ខែមិថុនា ឆ្នាំ២០២៤ ។
លោក មាស ដារ៉ា ប្រធានមន្ទីរស្តីទី នៃមន្ទីររៀបចំដែនដី នគររូបនីយកម្ម សំណង់ និងសុរិយោដីខេត្តបន្ទាយមានជ័យ បានបញ្ជាក់ថា ស្រុកម៉ាឡៃ មានក្បាលដីប្រមាណចំនួន ៥០ ៦២៦ក្បាលដី វាស់វែងប្រមូលទិន្នន័យបានចំនួន ៦ ២២៦ក្បាលដី និងបានចុះបញ្ជីចេញបណ្ណរួចចំនួន ៤ ៩៧៩ ក្បាលដី។ បច្ចុប្បន្នស្រុកម៉ាឡៃ មានចំនួន ៦ឃុំ ស្មើនឹង ៤៦ភូមិ ចេញបណ្ណរួចចំនួន ៤ភូមិ និងកំពុងវាស់វែងចំនួន១០ភូមិ។ លោក បន្តថា ជាក់ស្ដែង ការប្រកាសកំណត់តំបន់វិនិច្ឆ័យនៃការចុះបញ្ជីដីធ្លីមានលក្ខណៈជាប្រព័ន្ធនេះមានចំនួន១៣ភូមិរួមមាន៖
១/-ភូមិទួលពង្រ
២/-ភូមិបន្ទាយទី១
៣/-ភូមិសន្តិភាព
៤/-ភូមិអូរអំពិល
៥/-ភូមិរស្មីមានជ័យ
៦/-ភូមិអូរកេស
៧/-ភូមិស្រឡៅជ្រុំ
៨/-ភូមិអភិវឌ្ឍន៍
៩/-ភូមិទួលប្រាសាទ
១០/-ភូមិបឹងឈូក
១១/-ភូមិបឹង៧៥តេជោឈ្នះឈ្នះ
១២/ភូមិម៉ក់ហឺន
១៣/-ភូមិដូនសម ឃុំទួលពង្រ ស្រុកម៉ាឡៃ ខេត្តបន្ទាយមានជ័យ។
ក្នុង ឱកាសនោះដែរលោក លៀម សុដា អភិបាលរងខេត្តបន្ទាយមានជ័យ ក៏បានធ្វើការអំពាវនាវឱ្យបងប្អូនប្រជាពលរដ្ឋនៅក្នុងតំបន់វិនិច្ឆ័យ ដែលត្រៀមនឹងចុះធ្វើការវាស់វែងដីធ្លីមានលក្ខណៈជាប្រព័ន្ធត្រូវធ្វេីការកំណត់ព្រំដីរបស់ខ្លួនឱ្យបានច្បាស់លាស់ និងត្រូវរៀបចំឯកសារសំខាន់ៗដែលចាំបាច់ក្នុងការបញ្ចូលទិន្នន័យក្បាលដី មានដូចជា អត្តសញ្ញាណប័ណ្ណ សៀវភៅគ្រួសារ ឬសៀវភៅស្នាក់នៅ , សេចក្តីចម្លងសំបុត្រកំណើត ឬសេចក្តីចម្លងសំបុត្រអាពាហ៍ពិពាហ៍ ជាដេីម ។ ជាពិសេសលោក សំណូមពរដល់ម្ចាស់ក្បាលដីក្នុងភូមិបឹង៧៥តេជោឈ្នះឈ្នះ ដែលត្រូវចុះវាស់វែង ត្រូវចូលរួមសហការជាមួយនឹងអាជ្ញាធរ ក៏ដូចជាក្រុមការងារ ជួយសម្រួលក្នុងការចុះវាស់វែង ឱ្យបានលឿន ចៀសវាងមានបញ្ហាព្រំដី ៕ 
