កន្ទេលធំបន្លំដេកអភិបាល រង ខេត្តបន្ទាយមានជ័យម្នាក់ រំលោភយកដីផ្លូវ ធ្វើជាកម្មសិទ្ធិផ្ទាល់ខ្លួន តើថ្នាក់លើ គួរដាក់ចារកិច្ចសេុីបមើលផងទាន
ខេត្តបន្ទាយមានជ័យ៖កន្ទេលធំបន្លំដេក
ដីផ្លូវ មួយកន្លែង ត្រូវបាន លោកអភិបាល រង ខេត្តបន្ទាយមានជ័យ ម្នាក់មាន
ឈ្មោះ អោម ចន្ថា បានចាក់ ដី និង បោះបង្គោល របង រំលោភ យកដី ផ្លូវ ធ្វើជាកម្មសិទ្ធិ ផ្ទាល់ខ្លួន ដោយ មិនខ្លាច ញញើត និង ច្បាប់ឡើយ ។ ប្រភពបន្តថា ទីតាំងដីផ្លូវ ដែល លោក អោម ចន្ថា អភិបាលរង ខេត្តបន្ទាយមានជ័យ បានរំលោភយកនោះ គឺស្ថិតនៅជាប់ផ្ទះរបស់លោកអភិបាលរងខេត្តរូបនេះ ផ្ទាល់តែម្តង ហើយក៏ជាប់និងរបងស្នាក់ការ គយចល័ត ទឹកថ្លា ស្ថិតតាមបណ្តោយផ្លូវជាតិលេខ៥ ក្នុងភូមិ នឹង សង្កាត់ទឹកថ្លា ក្រុងសិរីសោភ័ណ ខេត្ត បន្ទាយមានជ័យ ។
នៅព្រឹកថ្ងៃទី១៩ ខែមករា ឆ្នាំ២០២២ ដោយ យោង តាមសម្តី របស់មន្រ្តី ម្នាក់ (សុំមិនបញ្ចេញឈ្មោះ) បានអះអាងឲ្យសារព័ត៌មាន ម្សិលមិញ ថ្ងៃនេះ យើងដឹងថា៖ ដីដែលត្រូវ បានគេចាក់ដី និង បោះបង្គោល របង រំលោភ យកដី ផ្លូវនេះ គឺពិតជា ឈ្មោះ អោម ចន្ថា មានតួនាទី ជាអភិបាលរង ខេត្តបន្ទាយមានជ័យ ពិតប្រាកដមែន ហើយដីផ្លូវ ដែលបាន រំលោភយកនេះ គឺនៅក្នុងប្លង់ដឺម៉ាស់ មានទទឹង រហូតទៅដល់ ២០ ម៉ែត្រ និងបណ្តោយ ជិត ១០០ ម៉ែត្រ ។
ពាក់ព័ន្ធ បញ្ហា ដូចខាងលើ ត្រូវបាន មហាជន រិះគន់ យ៉ាងចាស់ដៃ ផងដែរថា ធ្វើជាថ្នាក់ ដឹកនាំ មួយរូប មានតួនាទី ជាអភិបាល រងខេត្ត ម្នាក់ដែរ តើហេតុអី ចេះច្បាប់ និង ជាអ្នកអនុវត្ត ច្បាប់ បែរជា អង្គុយលើ ច្បាប់ បំពានលើ ច្បាប់បែបនេះ? មហាជន សូមស្នើ ដល់ ឯកឧត្តម ឱម យ៉ិនទៀង ប្រធានអង្គភាព ប្រឆាំង អំពើពុករលួយ និង សម្តេចក្រឡា ហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួង មហាផ្ទៃ មេត្តា ចាត់អធិការកិច្ចស៊ើប អង្កេត និង ទប់ស្កាត់ ជាបន្ទាន់ ផងទាន កុំអោយ មន្រ្តីថ្នាក់ក្រោម ជាតិមួយចំនួន ទៀតយកគំរូតាម ។
ជុំវិញ បញ្ហានេះ នៅរសៀល ថ្ងៃទី ១៩ ខែមករា ឆ្នាំ២០២២ នេះ លោក អោម ចន្ថា អភិបាល រងខេត្ត បន្ទាយមានជ័យ សារព័ត៌មាន យើង មិនអាចសុំការបំភ្លឺបានទេ ដោយសារខលចូលជាច្រើនដង តែមិនមានអ្នកទទួល ។ រីឯលោក អាង ណារិទ្ធ ប្រធាន មន្ទីរ រៀបចំ ដែនដី នគររូបនីយកម្ម សំណង់ និង សូរិយោដី ខេត្ត បន្ទាយមានជ័យ បានប្រាប់ តាមទូរស័ព្ទ ឲ្យដឹងថា ករណី លោក មិនទាន់ បានទទួល ព័ត៌មានទេ សូមសួរទៅលោកអភិបាលក្រុង សិរីសោភ័ណ ។ ដោយឡែកលោក ហុឺល រីយ៉ា អភិបាល នៃគណៈ អភិបាលក្រុង សិរីសោភ័ណ បានប្រាប់ថា ករណីនេះ លោក បានទទួលព័ត៌មាន និង ចាត់ចែងរួចហើយ ដោយឲ្យលោក អោម ចន្ថា អភិបាលរងខេត្ត ធ្វើកិច្ចសន្យា ខ្ចីដីផ្លូវ ប្រើប្រាស់ ធ្វើជាក្រោលគោសិន ទម្រាំលក់គោអស់។
ចំពោះបញ្ហានេះ មហាជន កំពុងតែមានការព្រួញបារម្មណ៍យ៉ាង ខ្លាំង ដោយខ្លាច លោកអភិបាលរងខេត្តរូបនេះ ប្រើក្បាច់គុណ កន្ទេលធំ បន្លំដេក នាពេលអនាគត់ ប្រជាពលរដ្ឋ ភ្លេចរឿងនេះ ហើយឆ្លៀតឱកាស ធ្វើលិខិតស្នាម រំលោភយកដីផ្លូវមួយនេះ ធ្វើជាកម្មសិទ្ធិផ្ទាល់ខ្លួន ។ ហើយម្យ៉ាងវិញទៀត ផ្លូវមួយខ្សែ គឺ មានប្រជាពលរដ្ឋ ច្រើនណាស់ បានប្រើប្រាស់ ផ្លូវមួយខ្សែនេះ ដើម្បី ចេញ-ចូល ទៅដីស្រែរបស់ពួកគាត់ ជាប្រចាំថ្ងៃផងដែរ ។ ក្នុងនោះប្រជាពលរដ្ឋ សួរថា ចុះបើបិទផ្លូវ បែបនេះ ឲ្យពួកគាត់ចេញ-ចូលបង្ករបង្កើនផល តាមណា?៕ដោយ៖ការិយាល័យនិពន្ធនាយក
